O BNG aposta todo á uva: quere se que cre unha lei galega do viño e que se aumenten as explotacións
Tamén defendeu que se establezan mecanismos directos e "constantes" de interlocución co sector e, como exemplo, apostou por unha mesa do viño en cada unha das denominacións de orixe coa participación de produtores, cooperativas e adegas.
Por Europa Press / Redacción | SANTIAGO DE COMPOSTELA | 20/09/2022 | Actualizada ás 17:56
A portavoz nacional do BNG, Ana Pontón, trasladouse este martes á adega Pazo Baión, en Vilanova de Arousa, para coñecer en plena época da vendima a produción e a situación do sector. Na súa visita, entre outras cuestións, propuxo unha lei galega do viño e fixar un prezo mínimo para a uva, así como garantir o pago en man aos produtores a través do Instituto Galego de Promoción Económica (Igape).
Acompañada da deputada Montse Prado, Pontón, que felicitou a "calidade e prestixio" dos caldos galegos, explicou a aposta do BNG por unha lei do viño "ambiciosa" e que forme parte dunha política de apoio ao medio rural. Durante a visita, defendeu que se aborden cuestións como a ampliación da superficie de cultivo vitícola ou como fomentar a substitución xeracional no sector.
Tamén defendeu que se establezan mecanismos directos e "constantes" de interlocución co sector e, como exemplo, apostou por unha mesa do viño en cada unha das denominacións de orixe coa participación de produtores, cooperativas e adegas.
Así mesmo, o BNG reclama contratos homologados con prezos mínimos para a uva, dando estabilidade ao sector tanto na parte de produción como na de comercialización, xunto con garantir o pago en man da uva a través do Igape, con "un sistema específico de financiamento".
A líder nacionalista tamén recalcou a necesidade de "seguir apostando pola innovación e a investigación" para continuar na senda da calidade dos viños galegos, que son "cada vez máis valorados a nivel internacional". Proba diso, lembrou que as exportacións roldan o 35 por cento da produción.
Así mesmo, a dirixente nacionalista apostou por fórmulas que permitan aumentar o tamaño das explotacións, xa que o sistema actual "penaliza" ao sector galego. Por exemplo, na campaña 2019-2020, Galicia só recibiu o 1,1 por cento do total dos 212 millóns distribuídos polo Estado con cargo ao Fondo español de garantía agraria, apenas un euro de cada 100.
PAZO BAIÓN
A leira e adega Pazo Baión pertence aos cooperativa Condes de Albarei, presidida por María Dores Calvo, a única presidenta dunha cooperativa vitícola en Galicia. Foi fundada en 1988, está integrada por 400 familias do Salnés e ten presenza en máis de 40 países.
O BNG lembra que, segundo datos oficiais, conta cun total de 13.247 viticultores no conxunto das denominacións de orixe, 461 adegas e unha superficie inscrita en conxunto de 9.266 hectáreas. O valor económico é de 206 millóns de euros.
