Por E.P. | SANTIAGO DE COMPOSTELA | 04/10/2022 | Actualizada ás 12:59
Eurodeputados do PP advertiron mediante unha misiva ao comisario de Medio Ambiente, Océanos e Pesca, Virginijus Sinkevicius, de que as consecuencias de decisións como o regulamento de execución do peche de ata 87 zonas á pesca de fondo "podería converter a Política Pesqueira Común (PPC) nunha fábrica de euroescépticos nas comunidades costeiras".
Este aviso foi trasladado por cinco eurodeputados do Partido Popular, membros da Comisión de Pesca do Parlamento Europeo, nunha carta ao comisario de Pesca. Ademais do deputado galego, Francisco Millán Mon, tamén asinan os parlamentarios populares dos "países máis afectados" e o español Gabriel Mato.
Segundo informaron nun comunicado, todos eles coincidiron en entender que o proceso para a adopción da medida "está viciado na súa forma e fondo", co que, segundo os populares, "xustifica a urxente e necesaria suspensión e revisión", xa que "non conta cun informe de avaliación de impacto socioeconómico adecuado".
No escrito constataron que "algunhas estimacións cifran en 500 embarcacións e en 2.500 pescadores e mulleres os operadores afectados", pero "a Comisión non proporcionou información".
SUSPENDER "URXENTEMENTE" A APLICACIÓN DO REGULAMENTO
Así, sinalaron que a votación do 28 de xuño, coa abstención de nove estados membros e o voto en contra dos países máis afectados, "debería ser suficiente para que a Comisión retirase a súa proposta e reconsiderase a súa decisión".
Ademais, criticaron que este regulamento de execución "esixía un informe previo" do Comité Científico, Técnico e Económico da Pesca (Cctep), "do que se carece". Nesta liña, instaron a "suspender urxentemente a aplicación do regulamento" e a revisar a decisión tendo en conta o próximo ditame do Consello Internacional para a Exploración do Mar (ICES) e "unha vez estea dispoñible unha avaliación do impacto socioeconómico!.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.