Unha vintena de alumnos reciben o premio extraordinario de bacharelato 2021/2022

Unha vintena de alumnos que o pasado curso realizaron 2º de Bacharelato foron recoñecidos "pola súa excelencia" co premio extraordinario de bacharelato 2021/2022. Segundo destacou a Xunta, o obxectivo deste galardón é valorar os méritos excepcionais baseados no esforzo e no traballo dos estudantes que finalizaron esta etapa educativa cun sobresaínte resultado académico.

Para optar a este premio, convocado pola Consellería de Cultura, Educación, FP e Universidades, os mozos debían contar cunha nota media en bacharelato igual ou superior a 8,75 puntos. Así mesmo, os candidatos tiveron que superar unha proba presencial estruturada en dúas partes.

A primeira centrouse na análise e comentario crítico dun texto sobre un tema de carácter xeral, histórico, filosófico ou literario, así como na resposta a cuestións de carácter cultural ou lingüístico sobre un texto na Primeira lingua estranxeira II cursada.

A segunda parte consistiu en desenvolver temas, respostas a cuestións ou exercicios prácticos dunha materia a elixir entre Matemáticas II, Matemáticas aplicadas ás ciencias sociais II, Latín II e Fundamentos da arte II.

Cada un dos galardoados recibe un premio económico de 1.000 euros e un diploma acreditativo. Ademais, a distinción de obter premio extraordinario farase constar nas certificacións académicas que se emitan.