Os establecementos do sector cultural poderán adherirse ao Bono Cultura da Xunta a partir deste sábado
A cidadanía poderá solicitar os bonos e beneficiarse dos descontos ata o 31 de decembro.
Por E.P. | SANTIAGO DE COMPOSTELA | 14/10/2022 | Actualizada ás 14:33
As empresas do sector cultural poderán adherirse ao Bono Cultura da Xunta a partir deste sábado a través da páxina web 'www.bonocultura.gal', mentres que o prazo de solicitude para as persoas usuarias se abrirá o 2 de novembro.
Poderán formar parte as persoas físicas ou xurídicas que teñan como obxecto da súa actividade a de venda ao consumidor de produtos e bens culturais en Galicia, os centros ou locais públicos ou privados destinados á exhibición de produción cultural como salas de cinema, teatros e auditorios, salas de concertos ou salas de exposicións.
Tamén museos, casas-museo ou similares, tanto de titularidade pública como privada e asociacións, entidades e fundacións de carácter cultural, tanto públicas como privadas, que ofrezan produtos culturais. Deberán estar dados de alta nalgún dos grupos ou epígrafes do imposto sobre actividades económicas (IAE) recollidos na orde da convocatoria que se publica este venres no DOG. Unha vez adheridos estarán identificados co selo distintivo.
O conselleiro de Cultura, Educación, FP e Universidades, Román Rodríguez, acudiu este venres á Libraría Couceiro, en Santiago, para pór en valor os "bos resultados" da campaña pasada cando "se conseguiu dinamizar as compras de outono cunha gran resposta de cidadáns e empresas". Ademais, asegurou que "se constatou o interese por gozar da cultura".
Segundo detallou a Xunta, na pasada edición apuntáronse 500 empresas e realizáronse preto de 70.000 operacións. "Este ano queremos axudar nun contexto económico de subida de prezos e tamén facilitar a incorporación do maior número de entidades posibles mellorando algún dos requisitos", explicou Román Rodríguez.
Os bonos, a disposición da cidadanía a partir do 2 de novembro e ata o 31 de decembro, terán un valor de 50 euros por usuario para gastar nos distintos establecementos que se adhiran na compra de produtos e servizos como libros, música gravada en CD ou vinilo, películas ou series en formato físico, salas de cinema, concertos de música, espectáculos escénicos, entre outras. Terán un desconto do 50% en cada compra ata esgotar o crédito.
