Por E.P. | Santiago de Compostela | 21/10/2022 | Actualizada ás 18:59
Un 84,5% dos ocupados galegos leva vivindo no mesmo concello máis de 5 anos, segundo a Estatística de Mobilidade Laboral e Xeográfica publicada este venres polo Instituto Galego de Estatística (IGE).
Así, no primeiro trimestre de 2022 residían en Galicia 1,09 millóns de persoas ocupadas, das cales un 1,8% cambiara de localidade de residencia en menos dun ano. Por outra banda, o 13,7% dese total levaba vivindo no mesmo concello entre un e cinco anos, mentres que o 84,5% restante, permanece coa súa residencia estable cinco ou máis anos.
"Ao considerar a idade dos traballadores, obsérvase como a mobilidade é maior entre a poboación ocupada máis nova. O 1,3% dos menores de 25 anos leva residindo no mesmo concello menos dun ano e para a poboación ocupada de entre 25 e 34 anos esta porcentaxe era do 4,8%", explica o IGE.
Con todo, no outro extremo atópanse as persoas de 45 anos ou máis, que só un 0,9% leva vivindo nun novo concello menos dun ano.
O Instituto Galego de Estatística destaca que a mobilidade da poboación ocupada de Galicia diminuíu con respecto a anos anteriores. Así, a porcentaxe de traballadores que cambiou de residencia nos últimos 12 meses pasou do 2,4% en 2021 ao 1,8% en 2022.
Entre outras cifras, o 36,3% da poboación galega ocupada no primeiro trimestre deste ano nunca se mudou de concello, mentres que o 38,6% si cambiara de municipio pero non de provincia.
Ademais, entre os ocupados que cambiaran de residencia en menos dun ano, o 68,8% non cambiara de provincia.
Pola súa banda, a mobilidade da poboación parada é superior á da ocupada, xa que o 3% dos galegos sen emprego cambiou de concello de residencia no último ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.