Investigacións de Avalia-T probaron a ineficacia da magnetoterapia no tratamento da dor aguda e crónica

O conselleiro de Sanidade, Julio García Comesaña, destacou este martes o traballo levado a cabo pola Unidade de Asesoramento Científico-técnico (Avalia-T) en ámbitos como a investigación sobre pseudoterapias e guías para pacientes paliativos.

Durante a súa intervención na clausura das IX Xornadas da Rede Española de Axencias de Avaliación de Tecnoloxías Sanitarias celebradas en Santiago de Compostela, subliñou que un dos retos aos que se enfrontan as axencias é "producir información de calidade, pero comprensible e que se produza a tempo".

Comesaña explicou os avances de Avalia-T, concretamente a investigación levada a cabo no ámbito das pseudoterapias, "determinou a ineficacia da magnetoterapia estática no tratamento da dor aguda e crónica".

Ademais, detallou a guía sobre atención paliativa ao adulto en situación de últimos días, "que proporciona información valiosa a profesionais sanitarios e familiares".

O titular de Sanidade sinalou que a avaliación "xoga un rol esencial" na decisión de incorporar aos servizos sanitarios aquelas tecnoloxías "que realmente achegan valor". Así, sostivo que nun contexto de innovación constante no ámbito da saúde, "é necesario dispor dunha ferramenta para a avaliación das consecuencias destes avances".

IX Xornadas da Rede Española de Axencias de Avaliación de Tecnoloxías Sanitarias. | Fonte: Xunta