A iniciativa 'Ponte...nas ondas!' consegue entrar no Rexistro de Boas Prácticas da Unesco

O programa educativo 'Ponte...nas Ondas!' entrou este xoves a formar parte do Rexistro de Boas Prácticas da Unesco, ao aprobarse a decisión no 17 Comité Intergobernamental para a Salvagarda do Patrimonio Cultural Inmaterial celebrado en Rabat (Marrocos).

O conselleiro de Cultura, Educación, FP e Universidades, Román Rodríguez, que encabezaba a delegación galega, destacou que a decisión "supón un gran triunfo para todos os galegos" e que esta iniciativa nada nas aulas "será un exemplo para todo o mundo".

Segundo sinalou a Xunta nun comunicado, esta é a primeira vez que Galicia recibe este recoñecemento por parte da Unesco. Así, Rodríguez afirmou que "vai servir de inspiración para concienciar á xente nova sobre a importancia de coidar o patrimonio". Ademais, subliñou que o proxecto, que comezou hai 27 anos, "é un exemplo de convivencia en zonas transfronteirizas e pode servir para mellorar o entendemento en rexións en conflito".

Nesta liña, lembrou que a iniciativa usa as radios escolares como "ferramenta fundamental para o seu desenvolvemento" e que se trata "dunha fórmula eficaz de salvaguardia nas escolas a ambos os dous lados da fronteira galego-portuguesa".

O conselleiro de Cultura, Educación, FP e Universidades, Román Rodríguez, despois de que 'Ponche...Nas Ondas!' entrase no Rexistro de Boas Prácticas da Unesco. XUNTA DE GALICIA | Fonte: Europa Press