Dous novos expedientes sancionadores por insultos graves no fútbol galego

A Comisión Galega de Control da Violencia continúa traballando na erradicación dos insultos no fútbol galego, tal como recolle a Xunta nun comunicado no día no que o secretario xeral para o Deporte, José Ramón Lete Lasa, presidiu unha nova reunión, a décima, desta entidade, que estudou doce novos casos relacionados con partidos disputados na Comunidade.

Durante o encontro, no que Lete Lasa insistiu, unha vez máis, na "responsabilidade de salvagardar os valores esenciais no deporte", decidiuse incoar tres procedementos sancionadores por "infraccións graves" ou "moi graves", non sen antes destacar o "intenso traballo" que se está realizando para "erradicar a violencia no fútbol".

Segundo informou o Goberno galego, dous dos expedientes sancionadores trátanse de dúas denuncias da Federación Galega de Fútbol por insultos e agresións nun partido de Primeira Autonómica de Cadetes e noutro da liga Norte Xuvenil.

O terceiro expediente sancionador abriuse pola venda de alcol e tabaco nas instalacións deportivas durante a celebración dun partido de fútbol da liga Galega Xuvenil de Primeira tras unha denuncia da Garda Civil.

Tamén se informou sobre outros sete expedientes por motivo de comportamentos e actitudes agresivas e antideportivas cometidas por membros da Federación Galega de Fútbol, polo que "deben ser sancionados por esta entidade".

Os dous expedientes restantes foron arquivados por non ser considerados os feitos como insultos ou ameazas sancionables pola Comisión Galega de Control da Violencia.

O Keltoi de Vigo, equipo de fútbol gaélico | Fonte: Arquivo