Galicia recreada virtualmente, a base para facer simulacións con IA
Sobre unha base cartográfica, datos reais procedentes de sensores e outras fontes permitirán ás administracións e empresas realizar simulacións e probas e mellorar a prestación de servizos co uso de tecnoloxías de intelixencia artificial.
Por Europa Press / Redacción | SANTIAGO DE COMPOSTELA | 04/01/2023 | Actualizada ás 13:22
Unha recreación virtual de Galicia sobre unha base cartográfica, datos reais procedentes de sensores e outras fontes permitirá ás administracións e empresas realizar simulacións e probas e mellorar a prestación de servizos co uso de tecnoloxías de intelixencia artificial.
'Xemelgo Dixital de Galicia' é unha das tres iniciativas que promove a Xunta e que forman parte dos 11 proxectos de transformación dixital que seleccionou o Goberno central na primeira fase do programa de Redes Territoriais de Especialización Tecnolóxica (Retech).
A Axencia para a Modernización Tecnolóxica de Galicia (Consellería de Facenda), a Axencia Galega de Desenvolvemento Rural (Medio Rural) e o Instituto de Estudos do Territorio (Medio Ambiente) desenvolverán a reprodución virtual de Galicia en forma de xemelgo dixital.
Esta ferramenta, segundo explica Facenda, permitirá planificar e xestionar de forma intelixente, con base en simulacións e analíticas predictivas, a prestación de servizos e actuacións públicas e privadas, sobre todo en contornas rurais.
O xemelgo dixital articúlase en torno ao proxecto Territorio Intelixente e o Sistema de Información Xeográfica da Xunta de Galicia (SIX).
As principais aplicacións terán que ver coas actividades agrarias, a mobilidade interurbana e a xestión de infraestruturas rurais.
Será aberto e colaborará con outros territorios; contará con servizos como simulador de escenarios, visualización 2D, 3D e 5D, visor GIS, cadro de mandos, mapa de rúas interactivo e información de meteoroloxía e clima.
Utilizará tecnoloxías de intelixencia de datos, como servizos analíticos, 'machine learning', algoritmos de IA, capa de modelado de datos e un espazo de datos. Os datos procederán de sensores de Internet das Cousas, cámaras fixas, aeronaves non tripuladas (UAVs) e estacións meteorolóxicas.
Con orzamento de 4 millóns, forma parte do proxecto Retech 'Aceleración de ecosistemas de emprendemento e innovación baseados en xemelgos dixitais', nos que tamén participan A Rioxa, Estremadura, Navarra e Castela-A Mancha.
