Evacuada unha muller con síntomas de intoxicación por fume tras arder a campá extractora da súa cociña en Boiro
Por Europa Press / Redacción | SANTIAGO DE COMPOSTELA | 08/01/2023 | Actualizada ás 11:09
Unha muller foi trasladada este domingo con síntomas de intoxicación por inhalación de fume despois de producirse un incendio na cociña da súa vivenda situada nun edificio da rúa Pablo Iglesias da localidade coruñesa de Boiro.
Segundo comunicou o 112 Galicia, os feitos sucederon ao fío das 03.30 horas deste domingo. Ao parecer, ardeu a campá extractora e producíronse diversos danos materiais na cociña da casa.
Foi un veciño do inmoble quen alertou aos servizos de emerxencia deste incendio. Nese momento, os xestores do 112 Galicia puxeron os feitos en coñecemento do Servizo de Urxencias Sanitarias de Galicia-061, dos Bombeiros de Boiro, da Garda Civil, do Servizo Municipal de Protección Civil e da Agrupación de Voluntarios de Protección Civil de Boiro.
Finalmente, a muller afectada foi evacuada polos servizos sanitarios ao Punto de Atención Continuada (PAC) da localidade coruñesa.
