Jácome, no xuízo por empuxar a unha sindicalista: "Arrepíntome de non denunciar eu, que fun o agredido"
A denunciante lamenta que o alcalde non se desculpou desde o ocorrido.
Por Europa Press / Redacción | OURENSE | 17/01/2023 | Actualizada ás 17:48
O Xulgado de Instrución número 1 de Ourense acolleu este martes o xuízo contra o rexedor de Ourense, Gonzalo Pérez Jácome, pola presunta agresión a unha sindicalista nunha manifestación celebrada o pasado 3 de maio.
"Arrepíntome de non denunciar eu, que fun quen sufriu a agresión", alegou o alcalde durante a súa comparecencia no xulgado, onde defendeu a súa actuación, que xustificou porque di sentirse "ameazado" no momento no que a denunciante, Lola Panero, achegoulle un megáfono.
Tanto a Fiscalía como a acusación particular que exerce a prexudicada impútanlle ao alcalde un delito leve de malos tratos de obra. Fiscalía solicita un mes de multa a razón de dez euros o día, mentres que a acusación particular pide 45 días de multa a razón de cincuenta euros o día e unha indemnización de 1.500 euros para a denunciante, tendo en conta o soldo do rexedor que, consultado na sala dixo que é de "70.000 euros brutos".
Os feitos remóntanse ao 3 de maio do 2022, no marco da folga do transporte urbano en Ourense debido ás diferenzas entre patronal e comité da empresa á hora de negociar o convenio laboral. Ese día, ao redor das 10.00 horas, estaba convocada na Praza Maior da cidade unha concentración por parte dos manifestantes entre os que se atopaban representantes do Comité de Empresa, CIG, UGT e Comisións Obreiras.
Unha representante deste último sindicato recibiu un empuxón por parte do alcalde. Segundo a súa versión, achegouse a Jácome con intención de ofrecerlle o megáfono mentres pedía que "achegase unha solución ao conflito". Tras varios intentos de pasarlle o megáfono o alcalde apartouna empuxándoa.
Naquel momento Jácome explicou que a actuación foi "en defensa propia" e que "a sindicalista liberada, que nin sequera traballa nesa empresa" meteuse " no seu espazo de forma exaltada" e "vociferando" polo que "temeu" que se producise "unha agresión acústica" que chegase a provocarlle a ruptura do tímpano.
Pérez Jácome recoñeceu no seu momento que "se tivese un par de segundos máis para pensar fixese outra cousa", pero "viu unha ameaza" e admitiu que el lle deu "un empuxón".
Na sesión oral celebrada este martes, a prexudicada, Lola Panero, asegurou sentirse "degradada como persoa" e insistiu en que se achegou ao alcalde, co megáfono, "con boa fe para resolver o conflito". "Despois non sei que pasou, tivo unha actuación rarísima, quedei paralizada", declarou a sindicalista, que mantivo que "non quixo provocar" ao rexedor.
Negou que puxese o megáfono "no oído" do alcalde ou "na súa cara". Tamén negou gritarlle e lamentou que despois do sucedido "o alcalde non se desculpou nin se interesou".
VERSIÓN DE JÁCOME
Pola súa banda, o alcalde relatou que el saía do concello e que lle dixeron que había unha protesta sindical na praza. "Dinme que saia por detrás e eu son o alcalde da cidade, un alcalde nunca sae por detrás", sostivo. Deste xeito, contou que hai anos xa tivera un altercado cun membro da banda de música, "que acabou no cárcere" por eses feitos e porque "tiña antecedentes".
Jácome sostivo ante o xulgado que eses feitos os tiña presentes cando saíu o 3 de maio a atoparse co grupo de manifestantes. Di que pensou "a ver que fai" a sindicalista que sostiña o megáfono no momento en que se achegou a pedirlle que se dirixise ás persoas concentradas ás portas do concello.
Con todo, expuxo que, cando fixo o simulacro de coller o amplificador de voz, a denunciante meteullo " na boca dunha forma que non se lle pode facer a unha persoa, non por ser unha autoridade senón a calquera persoa". "Metíamo e dicía: fale, fale, fale. Coma se fose un monigote", asegurou o alcalde, que mantivo que pediu á sindicalista que non lle tocase, momento no que se produciu o empuxón polo que foi denunciado.
