Rosalía de Castro centrará o festival Converxencias Portugal-Galicia con homenaxes en Braga, Ponteareas e Santiago

A novena edición do festival cultural Converxencias Portugal-Galicia homenaxeará a Rosalía de Castro nas localidades de Braga, Ponteareas e Santiago de Compostela a través de música, de danza, de teatro, de cinema, de charlas, de poesía, de exposicións e de visitas guiadas.

A programación, que conta con nomes como os de Iria Estévez, Pedro Jóia, Artur Caldeira, Quico Cadaval ou Augusto Canário, entre outros, ábrese este venres 10 de febreiro na cidade portuguesa de Braga, que acollerá a maior parte das actividades ata o día 24, e desenvolverase paralelamente no concello de Ponteareas ata pór o punto final en Santiago de Compostela co concerto Tributo a Zeca Afonso e Rosalía de Castro, coa participación de Canto d'Aquí, Iria Estévez e Pedro Jóia, na Cidade da Cultura.

O secretario xeral de Política Lingüística, Valentín García, participou este luns na rolda de prensa na que se deu a coñecer a programación deste certame cultural promovido polo grupo Canto d'Aqui e o Centro de Estudos Galegos da Universidade do Minho, pertencente á Rede de Centros de Estudos Galegos e Lectorados da Xunta, co apoio da Fundación Rosalía de Castro, do Concello de Ponteareas e da Rede dá GaliLusofonía, entre outras entidades.

Alí, o representante da Consellería de Cultura destacou que este festival cultural enmárcase nas accións de desenvolvemento da Lei Paz-Andrade para o aproveitamento da lingua portuguesa e os vínculos coa lusofonía coa que "a Xunta promove as relacións cos países de fala portuguesa".

Serán 15 días de festival que, como cada ano, programa unha serie de actividades ao redor da data de nacemento e de falecemento de Rosalía de Castro e do cantautor portugués José Afonso (Zeca Afonso), respectivamente, "estreitando os lazos que unen Portugal e Galicia yevidenciando os parecidos entre as súas linguas e culturas".

Rosalía de Castro | Fonte: Commons