"Construíndo feminismo aula a aula", a campaña de Erguer para o 8M
A organización convoca paros de dúas horas nos centros de ensino
Por Galicia Confidencial | Santiago de Compostela | 16/02/2023 | Actualizada ás 19:05
Erguer presenta a súa campaña para o 8M baixo o lema "Construíndo feminismo aula a aula" co obxectivo de mobilizar ás estudantes nas rúas e nas aulas no Día da Muller Traballadora. A organización estudantil pretende dar visibilidade aos problemas que diariamente sofren as estudantes.
"As mulleres estamos invisibilizadas e discriminadas no ensino de maneira sistémica, dende o borrado de nomes ao longo da historia ata a actualidade onde vemos como seguen existindo barreiras para acceder a determinadas carreiras ou para ascender academicamente" sinalou Marina, membro do CN da organización.
A campaña dá comezo este xoves e estenderase durante todo o mes, culminando coa participación das mobilizacións convocadas polo movemento feminista no propio día. "Queremos animar a todas as estudantes do país a saír as rúas este 8M para loitar por un ensino feminista e liberador, que contribúa a combater o patriarcado" concluíu.
Para culminar este traballo de "pisar as aulas", Erguer convoca paros de dúas horas, de 11:00h a 13:00h en todos os centros de ensino medio, formación profesional e universidades galegas co fin de que as estudantes poidan secundar as mobilizacións que se convoquen ao longo da mañá do propio día.
