Francisco Jarauta, Santiago Auserón, Patricia Mayayo ou Muguruza, entre os 15 nomes da Semana Galega da Filosofía
O relatores disertarán sobre o tema "Filosofía e arte"
Por E.P. | Pontevedra | 10/03/2023 | Actualizada ás 14:27
A 39º edición da Semana Galega de Filosofía xirará sobre o tema 'Filosofía e Arte' e contará con 15 relatores que disertarán, do 10 ao 14 de abril no Teatro Principal de Pontevedra, sobre esta "dimensión definitoria do ser humano xunto coa linguaxe e o pensamento".
Os representantes da entidade organizadora deste evento, presentaron este venres en rolda de prensa o cartel e a programación completa da Semana que seguirá a estrutura habitual de sesións de mañá, tarde e noite.
Unha ilustración de Daniel Rodríguez Castelao volve protagonizar o cartel, nesta ocasión elixiron a imaxe duns músicos porque "representa a liberdade do feito artístico, algo fundamental na concepción da arte".
As conferencias da mañá arrincarán ás 10,00 horas e serán as que conteñan "maior carga teórica e contido filosófico". O luns 10 de abril inaugura a Semana o catedrático de Filosofía da Universidade de Murcia, Francisco Jarauta.
O martes 11 será a quenda de Miguel Anxo Rodríguez con 'Os vellos monumentos a outros ollos'. Patricia Mayayo falará o mércores de "Ecofeminismos, ecoloxías queer e transhumanismos: diálogos entre as prácticas artísticas e a ecoloxía".
O catedrático, Luís Puelles abordará o tema 'O público e os espectadores. Tensións na xénese do suxeito moderno' e na última das mañás, Andrea Soto, falará de "A forza formadora das imaxes".
Os relatorios da tarde, empezan ás 17,00 horas e centrarán a súa temática no ámbito de Galicia. A primeira correrá a cargo de María Novas, 'Arquitectura e xénero: sobre a xerarquía de valores na produción de espazos para a vida'. O martes será a quenda de Iria Ribadomar, que falará de "Filosofía, arte e rúa. Ferramentas de transformación social ao servizo de quen?".
Sabela Hermida, será a encargada o mércores de achegar a súa charla 'O existencialismo na vida e na creación artística de María Casares'. O xoves será a quenda da poeta Chus Pato con 'Un poema pénsase con versos finais' e pechará as tardes da Semana Germán Labrador, para falar de 'Estética e historia. Sobre os imaxinarios políticos da arte na Galicia'.
En canto ás sesións de noite, arrincan ás 20 horas e terán un contido máis xeral, con menor carga filosófica. Abrirá o artista visual, Francesc Torres. O martes será a quenda de Remedios Zafra; o mércores chega ao Teatro Principal o músico e cineasta Fermín Muguruza e o xoves o historiador da fotografía e ensaísta, Víctor Vaquero.
Pechará as sesións de noite e tamén a Semana Galega de Filosofía o músico e doutor e Filosofía Santiago Auserón coa 'Lección de clausura: A música na Grecia Antiga e a orixe da Filosofía' o venres 14.
