Enfermeiros de familia acusan ao Sergas de poñer "parches" e non destinar recursos á sanidade pública

A Asociación Galega de Enfermaría Familiar e Comunitaria criticou o plan do Servizo Galego de Saúde para a cronicidade desde a atención primaria porque non dá continuidade a que sexan os mesmos profesionais quen realicen o seguimento dun mesmo paciente e se deixe isto en mans de médicos e enfermeiros que voluntariamente prolonguen a súa xornada laboral.

Nun comunicado emitido este luns, a AGEFC advertiu dos efectos da pandemia sobre o seguimento "dos pacientes fráxiles e con enfermidades crónicas", así como na "detección e manexo dos diferentes factores de risco para a saúde".

Uns problemas que, para a asociación de enfermeiras e enfermeiros de medicina familiar, non se atallan co programa deseñado polo Sergas, xa que consideran un erro que sexa levado a cabo "por médicos e enfermeiros que voluntariamente prolonguen a súa xornada laboral".

"Entendemos que isto vai en contra do principio de lonxitudinalidade da atención primaria, xa que non van ser necesariamente os profesionais de referencia destes pacientes os que leven a cabo estas accións, o que supón unha perda na continuidade na atención destas persoas", advertiu o colectivo.

Deste xeito, avogan por que ese seguimento sexa prestado polos profesionais dentro da súa xornada laboral, para o que "habería que analizar e pór solucións de raíz e non andar pondo parches aos problemas de persoal que actualmente sofre o sistema sanitario e, en especial, a atención primaria".

"As intervencións puntuais por parte dun profesional cada vez diferente non van supor a solución ao problema existente", sentenciou o colectivo nun comunicado que pechan coa demanda de máis recursos humanos para o Sergas como vía para reducir as cargas asistenciais e que, así, poidan ter capacidade para "manter o vínculo paciente-profesional".

Enfermeira sostendo a man dun paciente