Galicia queda sen recursos enerxéticos propios este 2023 e pasa a depender da enerxía fósil importada

Galicia esgotará este martes, 'Día da Depredación Enerxética', todos os recursos enerxéticos que tería dispoñibles para 2023 e pasará a depender o que queda de ano da enerxía fósil importada, segundo trasladou o Observatorio Galego da Acción Climática (Ogacli) nun comunicado.

Ogacli presentou este luns o informe 'Día da Depredación Enerxética (2010-2020)' no que se calcula o día en que se esgotaron os recursos propios no período 2010-2020. Para iso, usa información oficial sobre os recursos enerxéticos a partir dos que se obtén a enerxía dispoñible para o consumo.

Deste xeito, apunta que nesta década "non se observou unha tendencia de atraso" do Día da Depredación Enerxética, o que é "reflexo da estabilización no uso total de enerxía", así como do "estancamento no aproveitamento de recursos enerxéticos renovables propios".

Nesta liña, o informe indica que a enerxía galega renovable só achegou un 19% de toda a usada en Galicia entre 2010 e 2019, un indicador "moi relevante" sobre a transición enerxética e a acción climática. Así, Ogacli sinala que Galicia importou 114 millóns de toneladas de combustíbeis fósiles no período 2010-2020, maioritariamente extraídos no Sur global á custa de elevados danos socioambientais. Indonesia subministrou un 85% do carbón importado para as centrais de Meirama e As Pontes. México, Libia e Alxeria forneceron un 60% do petróleo e os seus derivados.  Nixeria, Trindade e Tobago e Perú achegaron conxuntamente un 70% de todo o gas fósil.

Cómpre salientar tamén o papel de Rusia como fornecedor de enerxía fósil a Galicia. Entre 2010 e 2020 Rusia foi o noso cuarto subministrador de petróleo e derivados e de gas fósil e o segundo de carbón.