O 'narcosubmarino' atopado na Arousa será reflotado polo mesmo remolcador que xa reflotou o de Aldán
O 'Insuíña Rande" xa foi mobilizado.
Por Europa Press / Redacción | VIGO | 14/03/2023 | Actualizada ás 10:44
Os efectivos de Garda Civil e Vixilancia Aduaneira retomaron á primeira hora deste martes as tarefas para tentar reflotar o 'narcosubmarino' afundido a unha milla da costa de Arousa, fronte ao porto de Vilaxoán.
Segundo informaron fontes da investigación, sobre as 8,00 horas deste martes desprazáronse á zona efectivos do Grupo Especial de Actividades Subacuáticas (GEAS), Servizo Marítimo, un helicóptero e varias patrullas da Garda Civil, ademais doutros efectivos.
Así mesmo, mobilizouse ao remolcador 'Insuíña Rande', con base no porto do Grove (o mesmo que participou no operativo de remolque do 'narcosubmarino' afundido con varias toneladas de cocaína a bordo fronte á ría de Aldán, en novembro de 2019), coa finalidade de reflotar o semisumerxible e poder así remolcalo a terra.
Este batiscafo foi avistado, semiafundido, na mañá do luns por mariñeiros que deron aviso ás autoridades, e enseguida mobilizáronse efectivos de Vixilancia Aduaneira, Garda Civil, Salvamento Marítimo e Policía Nacional, con medios marítimos e aéreos, e tamén con despregamento en terra.
Os investigadores barallan como principal hipótese que este artefacto, de fabricación caseira, estea vinculado coa actividade do narcotráfico e, en concreto, coas planadoras que apareceron varadas hai unhas semanas nas costas de Ribeira.
