A Xunta denuncia a deriva "medioambientalista" da UE e aposta por acordos entre países pesqueiros
Pide ao ministro aliarse con Francia, Portugal, Países Baixos e Irlanda.
Por Europa Press / Redacción | Santiago de Compostela | 15/03/2023 | Actualizada ás 11:34
A conselleira do Mar, Rosa Quintana, apela á creación de alianzas entre as rexións pesqueiras europeas para defender os intereses da frota ante a deriva " medioambientalista" e as restricións procedentes de Bruxelas. Sinalouno en declaracións aos medios de comunicación coincidindo coa súa participación na inauguración da última xornada de reunións do comité executivo do Consello Consultivo Rexional para as Augas Noroccidentales.
Preguntada polo que espera a Xunta da postura do ministerio ante o consello europeo do próximo luns, apuntou a "a necesidade de buscar aliados" e indicou que o presidente francés "xa saíu cunha postura totalmente contraria" no momento en que a Comisión fixo público o seu plan de acción.
"Francia xa é un país que debería apoiar, Portugal eu creo que tamén e Países Baixos e Irlanda por suposto", resaltou a conselleira. Neste sentido, incidiu en que "o único" que a Xunta pretende do ministro Luís Planas "é que sexa capaz de convencer ao resto das rexións da Unión Europea para que entre todos fagan entrar en razón á Comisión".
"QUE PARE CON ESTA DERIVA"
O obxectivo, segundo reiterou a titular de Mar, é "conseguir convencer á Comisión de que pare con esta deriva medioambientalista que está a adoptar e que pon en serio risco toda a actividade pesqueira" de Europa.
Esta semana celebrouse un consello consultivo no que "todas as comunidades autónomas" trasladaron ao responsable do ministerio "o apoio na defensa dos intereses do sector", lembrou Quintana.
