Renfe amplía as frecuencias entre Santiago e Vilagarcía

Renfe pon en marcha a partir do 28 de marzo sete servizos que reforzarán a conexión do eixo atlántico entre Santiago de Compostela e Vilagarcía de Arousa. Na actualidade son 18 as frecuencias que unen a capital galega e Vilagarcía de Arousa de luns a venres e 15 os fins de semana.

Con motivo da pandemia de coronavirus, a operadora ferroviaria suprimiu algunhas frecuencias e non as recuperou ata tempo despois do fin das restricións. Coa posta en marcha destes servizos, serán tres máis as opcións para viaxar de Santiago a Vilagarcía os días laborables, e catro os fins de semana, mentres que en sentido contrario auméntanse dúas frecuencias máis de luns a venres e tres os sábados e domingos.

As novas saídas diarias desde a estación de Santiago a Vilagarcía serán ás 11,00 horas, con chegada a Vilagarcía ás 11,37 horas; ás 18,00 horas, con chegada a Vilagarcía ás 18,36 horas; ás 22,00 horas, con chegada a Vilagarcía ás 22,41 horas --este tren ademais continúa a Vigo Guixar, onde chega ás 23,32 horas-- e ás 15,00 horas, con chegada a Vilagarcía ás 15,46 hora.

Mentres, as novas saídas desde Vilagarcía a Santiago serán ás 12,00 horas, con chegada a Santiago ás 12,38 horas; ás 20,35 horas, con chegada a Santiago ás 21,15 horas; e ás 7,46 horas --é o tren con saída de Vigo ás 6,57 horas--, con chegada a Santiago ás 8,27 horas.

A posta en marcha destas circulacións supón un incremento de máis dun 6% á oferta de prazas semanais que Renfe ofrece nos trens galegos de servizo público. Ata agora os trens do eixo atlántico e os Avant Ourense-Santiago-A Coruña, sumaban cada semana 100.000, ás que se suman 6.440 a partir do día 28 de marzo.