O 061 abre as súas portas a asociacións de pacientes

A Fundación Pública Urxencias Sanitarias de Galicia-061 acolleu este xoves unha Xornada de Portas Abertas para asociacións de pacientes, con patoloxías crónicas susceptibles de descompensarse e causar risco vital, con motivo da celebración da Semana da Administración Aberta. Este acto, que se celebra a nivel mundial, ten lugar en 76 países e implica a máis de 150 gobernos nacionais e rexionais.

Neste ano 2023, desde a Consellería de Facenda decidiuse organizar unha Xornada de Portas Abertas no 061 para achegar á cidadanía o funcionamento do servizo sanitario. Na visita participaron 22 persoas, membros da Asociación de Enfermos de Glucogenosis, Asociación Diabética Auria e Federación Galega de Enfermidades Raras e Crónicas.

A directora do 061, Adriana Regueira Pan, presentou aos participantes as principais liñas de actuación do servizo público de urxencias sanitarias extrahospitalarias, así como os proxectos máis inmediatos.

A xornada continuou cunha visita á Central de Coordinación, desde onde se xestiona a demanda sanitaria da Comunidade Autónoma, e a unha ambulancia asistencial de soporte vital avanzado na que persoal sanitario do 061 explicou como desenvolven a súa actividade diaria.

Durante a charla, Adriana Regueira subliñou a importancia dos programas específicos para patoloxías crónicas do 061 Galicia, que tratan de axilizar a asistencia sanitaria mediante a identificación temperá dos pacientes e da enfermidade que padecen e a aplicación inmediata do protocolo requirido.

Entre eles, atópase o programa Alerta Escolar, que conta con 7.789 nenos inscritos, dos que o 50% son alérxicos, o 29% sofren epilepsia, o 10% son diabéticos e o 11% restante sofren outras patoloxías.