Galicia pechou 2022 con case 12.000 millóns de débeda, un 2,24% máis

A Consellería de Facenda destaca que o cociente débeda/PIB en Galicia é 1,3 puntos inferior á dun ano atrás, ao baixar ata ese 17,2%, "en niveis prepandemia".

Por E.P. | Santiago de Compostela | 31/03/2023 | Actualizada ás 17:16

Comparte esta noticia

Galicia pechou 2022 con 11.977 millóns de euros de débeda, o que supón un aumento do 2,24% respecto da cantidade con que finalizara o ano 2021. Con todo, baixou, do 18,5% ao 17,2%, o que representa esta contía respecto ao total do produto interior bruto (PIB) da comunidade.

No conxunto das administracións públicas, a débeda pechou o exercicio 2022 en 1,502 billóns de euros, o que supón un incremento de 75.305 millóns respecto ao ano anterior, aínda que reduciu o seu peso sobre o PIB ata o 113,2%, situándose por baixo do obxectivo do Goberno, de acordo cos datos publicados este venres polo Banco de España.

Pola súa banda, a Consellería de Facenda destaca que o cociente débeda/PIB en Galicia é 1,3 puntos inferior á dun ano atrás, ao baixar ata ese 17,2%, "en niveis prepandemia". Subliña que coas cifras a peche de exercicio a comunidade ten un diferencial coa media autonómica de 6,7 puntos (sitúase no 23,9%).

Ademais, engade que Galicia "segue a senda da redución do endebedamento cunha redución de 2,5 puntos nos últimos dous anos, despois do incremento dos niveis para facer fronte á emerxencia motivada pola pandemia e á gran crise de 2008".

Así as cousas, resalta que a débeda por habitante sitúase en 4.447 euros, fronte aos 6.679 de media das comunidades, co que "cada galego debe hoxe 2.232 euros menos" que a media.

Tamén reivindica que o Banco de España "ratifica" que Galicia é a comunidade con menor aumento de volume de débeda desde o ano 2008, exercicio no que comezou a tendencia ascendente.

"A redución do endebedamento nos últimos exercicios fai que Galicia estea nunha mellor posición financeira para responder as esixencias económicas derivadas dos efectos negativos do coronavirus e para poder pasar da reactivación á recuperación", asegura.

Billetes en euros da serie Europa / BANCO CENTRAL EUROPEO - Europa Press. / Europa Press
Billetes en euros da serie Europa / BANCO CENTRAL EUROPEO - Europa Press. / Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta