Xa se poden consultar na rede os guións do primeiro programa en galego da BBC
'Galician Programme' foi a primeira emisión radiofónica en galego e contou coa colaboración de Fernández del Riego.
Por Europa Press / Redacción | A CORUÑA | 14/04/2023 | Actualizada ás 11:54
A Real Academia Galega (RAG) difundiu en Internet os guións que recollen as colaboracións de Francisco Fernández del Riego, protagonista este ano do Día das Letras Galegas, no espazo dedicado á cultura galega 'Galician Programme' que emitiu a emisora británica BBC entre 1947 e 1956.
Segundo informou a institución nun comunicado, trátase da primeira programación radiofónica "estable" en lingua galega. O espazo estaba coordinado desde Galicia por Fernández del Riego e editado e presentado polo xornalista ourensán Alejandro Raimúndez.
Fernández del Riego era o encargado de conseguir as colaboracións de figuras da cultura galega de distintas xeracións "desde Otero Pedrayo, Rafael Dieste e Pura Vázquez a Manuel María", engade.
Antonio Raúl de Toro, especialista en literatura irlandesa, é o autor de 'Galicia desde Londres', volume no que se recollen os guións de 'Galician Programme'. Con motivo da homenaxe a Fernández del Riego, a RAG comparte en copia dixital os textos destes programas "con contribucións asinadas pola propia Rega".
