A CIG chama a mobilizarse o 1 de maio para "parar o saqueo" da suba de prezos e a inflacción

A Confederación Intersindical Galega (CIG) fixo un chamamento á cidadanía para que se mobilice o vindeiro luns, día 1 de maio, co obxectivo de "dar resposta a unha realidade económica e social extrema" en Galicia. Nunha rolda de prensa en Santiago, o secretario xeral da CIG, Paulo Carril presentou a campaña para esta data, baixo a lema 'Paremos o saqueo'. Así, sinalou que "se está sufrindo unha espiral xeneralizada de subida dos prezos e inflación", o que "está a causar unha deterioración nas condicións de vida".

Carril referiuse, entre outras cuestións, a "unha nova reforma das pensións que amplía os recortes" e que "se suma á última reforma laboral coa que nin se recuperan nin se gaña dereitos". Sobre isto, o secretario xeral da CIG apuntou que, case un ano despois da súa entrada en vigor "baixo as novas formas contractuais segue crecendo a flexibilidade, a inestabilidade laboral e avanza a precariedade".

"Son tempo de loita para conquistar políticas alternativas, esixindo a intervención pública da economía e de sectores estratéxicos, como o enerxético, e tamén dos mercados, para pór fin á especulación de bens básicos", destacou Carril.

POLÍTICAS ECONÓMICAS

Nesta liña, remarcou que "o avance da dereita e da ultradereita hai que confrontalo e non alimentalo coas mesmas políticas económicas inxustas". Así, manifestou que "o capital está a tirar proveito da inflación e da carestía da vida" e "obtendo millonarios beneficios a conta de especular cos prezos".

Carril afirmou que as políticas económicas "están a acelerar o aumento e as desigualdades e a pobreza" en Galicia. Desta forma, asegurou que o Goberno de Alfonso Rueda "vive entregado á carreira electoral de Feijóo en Madrid" e "segue mentido nunha acción de desmantelamento masivo".

Representantes da CIG na presentación da campaña do 1 de maio | Fonte: Europa Press