Rajoy mitineará máis que Feijóo en Galicia durante as municipais
Feijóo acudirá a un acto, mentres que Rajoy ten previsto participar en dous mítines en Pontevedra e Santiago.
Por Europa Press / Redacción | Compostela | 03/05/2023 | Actualizada ás 18:25
O líder do PP, Alberto Núñez Feijóo, percorrerá todas as comunidades autónomas na campaña do 28 de maio, aínda que hai varias autonomías nas que fará dobrete ou triplete, como Castela-A Mancha, Comunidade Valenciana, Madrid ou Aragón, segundo avanzou o coordinador xeral do partido e director de campaña, Elías Bendodo.
Tras participar na última fase de precampaña na romaría do Pino que organiza o PP provincial da Coruña, Feijóo recalará, en consecuencia, de novo en Galicia. Aínda que a súa axenda non está pechada e podería haber variacións nas datas, fontes da formación consultadas por Europa Press ratificaron que se lle espera de volta a Galicia en torno ao ecuador da campaña electoral.
Entre tanto, nunha rolda de prensa na sede do PP para presentar a axenda de campaña, Bendodo sinalou que Feijóo "percorrerá de punta a cabo toda España", xa que participará no medio centenar de actos este mes en todas as comunidades, incluíndo ademais visitas a Ceuta e Melilla este xoves e venres.
INTENSA AXENDA DE AZNAR E RAJOY
Ademais, Bendodo sinalou que os ex presidentes Mariano Rajoy e José María Aznar participarán de forma activa na campaña, un feito que, segundo dixo, evidencia que o partido chega "unido" e "en plena forma".
Así, detallou que Rajoy estará este xoves en Madrid; o día 8 visitará Castelló; o día 13 viaxará á súa terra, Pontevedra; o 14 estará en Santiago; o 18 en Salamanca; o día 20 en Madrid; o 21 en Marbella (Málaga); e o 25 en Roquetas de Mar (Almería).
