O espírito creador de Pamen Pereira pasa a formar parte da Real Academia de Belas Artes

A artista Pamen Pereira ingresou este sábado na Real Academia Galega de Belas Artes (RAGBA), nun acto celebrado no auditorio do Centro Galego de Arte Contemporánea (CGAC) en Santiago, como académica numeraria da Sección de Escultura tras a lectura do seu discurso 'Demasiado preto, demasiado lonxe'.

O presidente da institución, Manuel Quintana Martelo, eloxiou o "amplísimo e brillante" currículo profesional de Pamen Pereira e deulle a benvida á Academia coa seguridade de que a súa achega será "grande e ben estimada".

Das obras da artista, o presidente destacou que viran ao redor do diálogo entre conceptos como arte e vida, natureza e compromiso, enerxía e procura, ciencia e poesía. Facendo referencia a súa traxectoria, Martelo apuntou que xa nas súas primeiras exposicións mostraba un modo especial de mirar a natureza, deténdose en mapas e paisaxes e mostrando as súas ideas dunha maneira aberta.

Real Academia Galega das Belas Artes | Fonte: Wikipedia