A Xunta subvencionará o 100% das gardarías privadas para que sexan gratuítas o próximo curso

As entidades, que recibirán ata 329 euros, terán que acreditar que os nenos que asisten cumpren co calendario de vacinación galego.

Por Europa Press / Redacción | A Coruña | 05/06/2023 | Actualizada ás 11:58

Comparte esta noticia

A Xunta convoca as axudas destinadas a gardarías privadas para promover a aplicación nas escolas infantís 0-3 anos da súa titularidade dunha bonificación do 100% do prezo correspondente á atención educativa prestada aos nenos e nenas de Galicia entre o 1 de setembro de 2023 e o 31 de agosto do 2024.

Así, segundo recóllese no Diario Oficial de Galicia (DOG) deste luns, serán destinatarias da concesión destas axudas as entidades privadas xestoras destes recursos que acrediten a aplicación dunha bonificación do 100% do prezo correspondente á atención educativa prestada desde o inicio do devandito curso.

Para ter dereito ás axudas reguladas nesta orde, os nenos e nenas deben ter a súa residencia en Galicia. Ademais, considérase que os menores con necesidades específicas de apoio educativo ocupan dúas prazas. Neste caso, a axuda que resulte segundo o establecido neste artigo multiplicarase por dous.

Poderán optar a estas axudas aquelas entidades que non accedan á bonificación a través doutras liñas de axuda da Consellería de Política Social e Xuventude, apliquen a gratuidade da atención educativa nas escolas infantís 0-3 e cumpran requisitos como que a escola infantil dispoña da documentación que acredita que os nenos e nenas que asisten a ela seguen o calendario de vacinación infantil do Programa galego de vacinación ou que teña as súas tarifas desagregadas por tipo de gasto e actualizadas no Rexistro Único de Entidades Prestadoras de servizos Sociais da Consellería.

A convocatoria comprende unha liña de axudas destinada a compensar a aplicación da bonificación do 100% do prezo da atención educativa na contía do prezo mensual que lle correspondería abonar á familia segundo as tarifas establecidas polas horas de asistencia do neno ata un máximo de 329 euros/mes por praza a xornada completa, excluído o mes de vacacións.

Gardaría municipal  con nenos xogando
Gardaría municipal con nenos xogando | Fonte: EP

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta