O Son do Camiño abre outra edición con 120.000 espectadores e hoteis chegando á ocupación total

O compostelán Monte do Gozo acolle desde este xoves 15 de xuño e ata o sábado 17 o festival Son do Camiño, ao que se espera que acudan 120.000 espectadores procedentes de 35 países para ver a artistas como Bizarrap, Maluma ou Aitana, as cabezas de cartel desta edición. A poucas horas de que arrinque o festival, os establecementos hoteleiros da cidade rozan o cheo.

Consultada por Europa Press, a Asociación de Hostalaría de Compostela aseguraba que, en base á enquisa de ocupación realizada entre os hoteis asociados hai uns días, a media de ocupación era dun 96,78%. Polo que agora, "igual sería mesmo máis polas reservas de última hora", matizan. Apuntan ademais que algúns pequenos e medios establecementos hoteleiros xa estaban completos.

Aínda que aseguran que as expectativas son "boas" en canto ao movemento de visitantes na cidade, matizan tamén que isto leva "certa preocupación" polo mal funcionamento dalgúns servizos "que se agravarán estes días". Refírense, entre outros, ao servizo de taxis, "que repercutirá no sector da hostalaría", como ocorre "cando hai congresos, etc.".

O SON DO CAMIÑO, EN CIFRAS

Nesta liña, a organización do festival estima que O Son do Camiño chegue a xerar ao redor de 1.000 postos de traballo directo e máis de 5.000 indirectos. Aínda que o retorno económico é difícil de calcular de maneira previa, apuntan a que superará os 90 millóns de euros. Na edición pasada, o retorno publicitario foi de máis de 70 millóns de euros.

Na rolda de prensa de presentación do festival, destacábase que esta "é a edición máis grande que se fixo ata a data", con "bastantes cambios no concepto do festival". A cita conta este ano con máis de 40 artistas de "talla internacional".

Esta será a primeira vez que haberá dous escenarios principais, situados un á beira do outro, de forma que "xusto ao acabar nun escenario, empeza o seguinte no outro escenario". Isto débese a que hai un "maior número de artistas principais na programación". Ademais, haberá un terceiro escenario dedicado á música electrónica. Entre outras novidades, a cita contará cunha nora, consignas para que a xente poida gardar as súas pertenzas, 'foodtrucks'.

40 ARTISTAS NACIONAIS E INTERNACIONAIS DE TODOS OS XÉNEROS

Ademais de Bizarrap, Maluma e Aitana, completan o cartel artistas como Leiva ou Duki --que xa estivo o ano pasado--. Eladio Carrión, o artista americano símbolo internacional do reguetón e o trap latino, tamén estará en Santiago, así como Moura.

Doutra banda, tamén actuarán Alt-J, banda inglesa de indie-rock, e os tamén ingleses The Kooks. Únense, así mesmo, os australianos Wolfmother e os Royal Blood, que visitarán Galicia por vez primeira en 2023.

Esta edición contará tamén coas actuacións de Vetusta Morla, WOS e Kaiser Chiefs. O produtor sueco Steve Angello, integrante de Swedish House Mafia, un dos maiores referentes mundiais da música electrónica, será outra cabeza de cartel do festival santiagués.

Ademais, Morten chegará desde Dinamarca para ser outro representante da electrónica escandinava, unha das grandes protagonistas dO Son Do Camiño 2023.

A todos estes nomes uniranse outros grandes representantes do mellor do panorama nacional, internacional e galego: Xoel López, Viva Suecia, Nervo, Marlon, Ginebras, Delaporte, Niña Polaca, Mavica, Dani, Chica Sobresalto, Anaju, Nano, Sila Lua, The Rapants, Babykatze, Flaca, Groove Amigos, Michenlo, Toccororo, Fillas de Cassandra, Alexandre Sam, Galician Army, Chico Blanco, Karras Martínez, Yung Prado, Bárbara Lago, Bastian Bux, Fer BR, Mëstiza y Thom Archi completan este cartel.

FOLGA DE AUTOBUSES, DESCONVOCADA

Dada a magnitude do evento, a organización prevía "darlle unha volta" ao transporte se finalmente continuaba en pé a folga convocada polo transporte urbano de Santiago para os días 15, 16, 17 e 18 de xuño --coincidindo co festival O Son do Camiño--; un parón que finalmente foi desconvocado o venres pasado tras coñecer que o Concello "asume" a doutrina do TSXG sobre a UTE.

Segundo informaron entón en comunicados de prensa CCOO, UGT e CIG, consideran "satisfactoria" a resposta, aínda que advirten de que volverán convocar "se quen resulte adxudicatario divide o cadro de persoal".

XUNTA LOCAL DE SEGURIDADE

No que respecta á seguridade, a subdelegada do Goberno na Coruña, María Rivas, confirmou a "total dispoñibilidade e colaboración" por parte da Subdelegación para garantir a seguridade no festival.

Así o expresaba tras a Xunta Local de Seguridade extraordinaria que se celebrou o venres pasado no Pazo de Raxoi. Na reunión acordouse reforzar a seguridade e vixilancia tanto dos accesos ao recinto como dos aparcadoiros disuasorios que se habilitarán en San Lázaro e no multiusos Fonte do Sar. Instarán ademais á empresa organizadora a que estableza puntos violeta no recinto.