Condenan ao Sergas a pagar a operación dun paciente que na pandemia tivo que ir á privada
Foi atendido por un médico que exerce na sanidade pública pero ten consulta na privada. O xuíz, que lembra a situación excepcional pola covid, non concede outros 5.000 euros por dano moral pola rapidez do diagnóstico.
Por Europa Press / Redacción | VIGO | 19/06/2023 | Actualizada ás 16:19
O Xulgado do Contencioso-Administrativo número 1 de Pontevedra condenou ao Servizo Galego de Saúde (Sergas) a pagar un total de 7.140 euros a unha paciente da área sanitaria de Pontevedra-O Salnés, por ter que acudir a operarse dunha hernia discal ao Hospital A nosa Señora de Fátima, centro privado de Vigo, como consecuencia da reordenación de recursos durante a primeira onda de covid-19, na primavera de 2020.
O doente reclamaba máis de 12.000 euros por estes feitos, pero o maxistrado estimou a súa reclamación só en parte, determinando que non proceden os 5.000 euros que pedía por danos morais dada a celeridade coa que se efectuou o diagnóstico.
Segundo o relato de feitos da sentenza, con data do pasado 12 de xuño, o afectado --de 44 anos de idade-- acudiu "en reiteradas ocasións" entre marzo e abril de 2020 ao seu centro de saúde do Grove e ao servizo de Urxencias do Complexo Hospitalario de Pontevedra (CHOP) por "dor intolerable" a pesar da medicación.
Déronlle o alta hospitalaria cunha cita para un mes despois para "valoración". Ese diagnóstico, explica o fallo, recollía "unha dor moi intensa e incontrolable nas costas, restrición de capacidade deambulatoria e o temor razoable a un agravamento da doenza, con risco de perda funcional dalgún membro".
Así pois, este paciente solicitou unha segunda opinión na consulta privada do doutor que lle recomendaron, que ademais traballaba tamén para o Sergas no Álvaro Cunqueiro de Vigo. En concreto, foi á súa consulta no Hospital A nosa Señora de Fátima, onde se operou.
A Xunta, durante o xuízo, sostivo que acudira a esta clínica "pola súa propia vontade" e que non se cumprían os requisitos establecidos para a cobertura de gastos por parte da Administración porque non era unha "urxencia vital".
Con todo, o maxistrado explica na súa sentenza que foi "correcta" a decisión do home de intervirse na sanidade privada, á vez que subliña que o gasto que tivo que asumir "reúne os requisitos de antixuridicidade" establecido no artigo 32 da Lei do Réxime Xurídico do Sector Público. Por isto mesmo, ve procedente que a Consellería de Sanidade o teña que compensar.
Así, recalca que, de non ter feita a operación nesas datas, "tería que soportar, innecesariamente, durante un longo período de tempo, unhas dores moi intensas, así como os efectos secundarios da medicación paliativa prescrita, con risco de agravamento da lesión de columna".
