Megasa presenta un ERTE tras detectarse un produto radioactivo e paralizarse a produción
Afecta a medio centenar de traballadores da planta situada en Xuvia, Narón.
Por E.P. | SANTIAGO DE COMPOSTELA | 21/06/2023 | Actualizada ás 12:07
A siderurxia Megasa presentou un Expediente de Regulación Temporal de Emprego (ERTE) para o medio centenar de traballadores da sección de acería da planta situada en Xuvia, Narón, ante a imposibilidade de retomar a fundición tras localizarse o pasado 8 de xuño un produto radioactivo, confirmado logo polo Consello de Seguridade Nuclear (CSN).
Así o confirmou o presidente do comité de empresa, Carlos Bascoy (UXT), que detallou que esta decisión foi "por causas de forza maior" e aplícase desde o pasado luns. O representante sindical sinalou que a alarma radioactiva produciuse o 8 de xuño, pero a empresa "non convocou" aos traballadores ata o pasado mércores para facer a súa proposta de cambio de horario.
Así, propúñase que "dos oito ou nove días que hai de vacacións en Nadal, pasalos agora e unilos cos días de vacacións de verán". Estas propostas foron rexeitadas nunha asemblea de traballadores, que alegaron que sería "o terceiro ano" que lles cambian as vacacións de Nadal.
Ante esta negativa, a dirección comunicou a aplicación do ERTE sen que exista unha data definida de retorno. Mentres ocorre isto na sección de acería, os traballadores de laminación continúan traballando con normalidade, "algo que se está facendo desde o día que pasou o incidente".
RECOÑECEMENTOS
Por outra banda, a maioría de traballadores de acería xa foron sometidos a un recoñecemento médico nas propias instalacións industriais sen que se detectou, ata o momento, ningunha afectación.
Está previsto que os recoñecementos médicos conclúan no mediodía deste mércores para os 48 traballadores de acería e para os outros 12 empregados que pediron ser sometidos a estas probas de forma voluntaria.
En canto ao proceso para retirar os restos radioactivos que foron detectados no interior dun camión que saía da fábrica, nun arco de seguridade, Bascoy detallou que unha empresa homologada neste tipo de actividade "está a facer este traballo, pero que "non vai todo o rápido que pensabamos que ía ir".
