Piden 10 anos e medio de cárcere para unha acusada de cobrar a estranxeiros por falsos contratos para entrar no país
O Ministerio Público tamén pide o pago dunha multa e indemnizacións.
Por E.P. | SANTIAGO DE COMPOSTELA | 24/06/2023 | Actualizada ás 19:06
A Audiencia Provincial da Coruña acollerá o vindeiro venres, día 30, o xuízo contra unha muller acusada de cobrar diñeiro a estranxeiros por falsos contratos de traballo para regularizar a súa situación en España. O fiscal pide para ela 10 anos e medio de prisión.
Segundo recolle o escrito de acusación, entre maio de 2005 e decembro de 2006, a muller contactou con diferentes cidadáns estranxeiros que non se atopaban en situación regular, ou que querían traer a familiares, para ofrecerlles a posibilidade de "tramitarlles contratos de traballo como empregados do fogar a cambio do pago dunha cantidade de diñeiro".
Nestes contratos ficticios, facíase constar como empregadora ela mesma ou o seu marido, unha persoa dependente con infarto cerebral, así como unha terceira persoa con discapacidade da que obtivo os seus datos pola amizade coa súa filla. Cobraba por estas xestións entre 2.000 e 1.500 euros por persoa, así como outros pagos adicionais.
Todo iso "causou prexuízos importantes a varios cidadáns estranxeiros que crían na realidade do traballo que se lles ofrecía e pagaron á acusada cantidades importantes de diñeiro, non chegando a conseguir traballo nin residencia en España", explica o fiscal, aínda que algúns deles se entraron no país valéndose destas ofertas falsas.
O Ministerio Público considera estes feitos constitutivos dun delito contra os dereitos dos cidadáns estranxeiros, incorrendo o ánimo de lucro, así como un delito continuado de falsidade en documento público. Polo primeiro deles pide para a muller oito anos de prisión e dous anos e medio máis polo segundo delito, así como o pago dunha multa e indemnizacións.
