O PP presentará a Luís Menor como candidato a presidir a Deputación de Ourense tras a marcha de Baltar
Un acordo asinado con Democracia Ourensá, partido do alcalde de Ourense cidade, Gonzalo Pérez Jácome, permitiralles gobernar a institución provincial.
Por Europa Press / Redacción | OURENSE | 04/07/2023 | Actualizada ás 20:28
A Xunta Directiva do PP de Ourense aprobou este martes designar a alcalde do Pereiro de Aguiar, Luís Menor, como candidato a presidir a Deputación Provincial, tras a xa anunciada renuncia de Manuel Baltar a continuar.
Así se acordou nunha reunión na tarde deste martes celebrada a porta pechada e á que asistiu, ademais do propio Baltar como líder do partido na provincia, o presidente do PP galego, Alfonso Rueda, e a súa secretaria xeral, Paula Prado. Luís Menor era o principal nome ao que voces do partido apuntaban como próximo titular da Deputación e este luns era confirmado como integrante do grupo provincial do PP.
Cabe lembrar que os populares teñen, a priori, asegurada a Deputación como forza máis votada. Aínda que quedaron a un escano da maioría absoluta, un acordo asinado con Democracia Ourensá, partido do alcalde de Ourense cidade, Gonzalo Pérez Jácome, permitiralles gobernar a institución provincial.
