Por Europa Press / Redacción | Santiago de Compostela | 13/07/2023 | Actualizada ás 16:31
A CRTVG programou para este venres ás 10:00 horas un debate electoral central no que participarán os candidatos ao Congreso pola provincia da Coruña das catro formacións que actualmente teñen representación: Miguel Tellado do PP, José Miñones do PSOE, Marta Lois de Sumar e Néstor Rego do BNG.
O moderador será o xornalista Luís Ojea, será retransmitido en directo e durará unha hora de 10 a 11 da mañá. Poderá seguirse en todos os medios da CRTVG: Televisión de Galicia, Radio Galega e canle dixital g24.gal, así como poderase volver ver na G2 ás 22:45 horas dese mesmo día, emisión na que se incorporará a interpretación en lingua de signos.
Os bloques de debate acordados no plan de cobertura son: a situación política actual, gobernación e modelo de Estado, políticas sociais e atención á cidadanía, e un terceiro sobre economía, industria, infraestruturas e fiscalidade.
ENTREVISTAS
Ademais, a próxima semana a CRTVG realizará entrevistas individuais aos catro candidatos. As datas serán, BNG, luns 17 de xuño; Sumar Galicia, martes 18; PSdeG-PSOE, o mércores 19; e o PP, o xoves 20. Todas elas terán lugar ás 8:30 horas da mañá e poderanse escoitar na Radio Galega e tamén a través da web. A CRTVG explica que as datas, horarios e tempos destas entrevistas establecéronse segundo o criterio de proporcionalidade con respecto aos resultados das últimas eleccións.
O ente público lembra que a estas coberturas hai que sumar o despregamento informativo o propio domingo 23 de xullo, con cobertura nos distintos servizos informativos da TVG, con dous adiantos informativos, un ao mediodía e outro pola tarde, e un programa especial, de máis de cinco horas de duración presentado por Marta Darriba, Marcos Sueiro e Carlos Amado.
CONEXIÓNS
Este espazo establecerá conexións coas sedes dos partidos e os principais centros de votación, ofrecerá ás 20:00 horas o resultado do tracking realizado por SigmaDos para FORTA e, unha vez pechados os colexios electorais, seguirá minuto a minuto o reconto.
A Radio Galega tamén ofrecerá toda a actualidade da xornada a través dos seus informativos dende primeira hora da mañá e cun programa especial que analizará todas as claves da cita coas urnas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.