O Goberno destina 28,5 millóns para zonas de baixas emisións en seis municipios galegos
Por E.P. | Vigo | 24/07/2023 | Actualizada ás 13:41
O Ministerio de Transportes, Mobilidade e Axenda Urbana concedeu definitivamente 500 millóns dos fondos europeos a 112 municipios en toda España para a construción de carrís bici e a adquisición de ata 376 autobuses urbanos cero emisións, entre outras actuacións. Deste total, 28,5 millóns van parar a seis localidades galegas.
En concreto, A Coruña, Vigo, Pontevedra, Arteixo, Narón e Ourense recibirán 28,5 millóns para levar a cabo diferentes accións no ámbito da mobilidade sustentable, as zonas de baixas emisións e a mellora da accesibilidade.
Así, será Vigo o municipio galego que recibirá unha maior axuda, con 10,1 millóns para accións como a implantación de sistemas de control de zonas de baixas emisións ou ramplas mecánicas en diferentes rúas.
Pola súa banda, A Coruña obtivo 9,09 millóns e Pontevedra, 2,7 millóns. Arteixo recibirá 908.000 euros; Narón, 1,56 millóns, e Ourense, 4,2 millóns, que destinará a crear un aparcadoiro disuasorio no Parque Coto do Canedo ou á implantación de bicis eléctricas públicas na cidade, entre outras accións.
Segundo informou o Ministerio, destinarase máis da metade do orzamento (500 millóns) para construír estes carrís bici, a peonalización de rúas e a implantación de sistemas públicos de aluguer de bicicicletas e outros vehículos de mobilidade persoal.
O resto, 101 millóns de euros, investiranse en renovar as frotas de autobuses, mentres que 97 millóns de euros irán destinadas á eficiencia no transporte público, incluíndo o reforzo dos servizos ferroviarios urbanos, a repartición de mercadorías na última milla e o acougado do tráfico rodado.
