Morre unha condutora que ía en dirección contraria tras chocar contra un camión en Piñor
O condutor do camión, nacido na Coruña e que resultou ileso, relata que a muller da furgoneta buscou encaixarse intencionadamente contra o seu vehículo.
Por Europa Press / Redacción | OURENSE | 29/07/2023 | Actualizada ás 10:58
Unha muller, nacida en 1965 e veciña de Entrimo, faleceu nunha colisión frontal da furgoneta que conducía en dirección contraria pola AG-53 ao chocar cun camión á altura do municipio ourensán de Piñor.
Segundo informa a Garda Civil, ás 23,27 horas recibiuse aviso dun vehículo circulando en dirección contraria pola autovía AG-53. Ás 23,30 horas, o 112 Galicia comunicaba unha colisión frontal entre unha furgoneta e un camión.
O condutor do camión, nacido na Coruña e que resultou ileso, relata que a muller da furgoneta buscou encaixarse intencionadamente contra o seu vehículo.
O camioneiro explicaba que circulaba polo carril dereito en sentido Dozón, pero, ao decatarse de que a furgoneta viña en dirección contraria, desprazouse ao carril esquerdo para evitar o accidente. Con todo, a condutora fixo a mesma manobra para chocar frontalmente contra o camión.
As chamadas de varias persoas ao 112 posibilitaron a posta en marcha dun operativo de rescate e atención. De feito, acudiron os Bombeiros do Carballiño, xa que a vítima estaba, ademais, atrapada no interior da furgoneta, e os profesionais de Urxencias Sanitarias de Galicia-061, quen só puideron confirmar o falecemento.
Tamén contaron coa colaboración dos voluntarios de Protección Civil e interviñeron os axentes da Garda Civil de Tráfico co fin de reunir todos os datos do sinistro.
Por último, foi necesario efectuar a limpeza da vía para retirar os danos e restablecer as condicións de seguridade. Por iso, foron informados os equipos da Axencia Galega de Infraestruturas.
