Por Europa Press / Redacción | SANTIAGO DE COMPOSTELA | 31/07/2023 | Actualizada ás 12:08
O exsecretario xeral do PSdeG Gonzalo Caballero continuará e reforzará en agosto, xa con data para a elección do candidato á Xunta (17 de setembro) encima da mesa, o proceso de escoita que iniciou cos seus compañeiros e compañeiras de partido, aínda que afirma que non lle interesa "unha batalla orgánica polo mero feito de dala" e que a dirección actual debería "reflexionar" sobre cal é "a mellor opción" para o partido.
"Ninguén busca unha batalla orgánica en si mesma, senón que se trata de elixir a mellor opción do PSdeG para dar aos galegos unha alternativa forte desde a esquerda", aseverou o tamén deputado socialista, quen non avanza, por agora, se se presentará ao proceso de primarias. En declaracións a Europa Press, alegou que as primarias son "un instrumento", pero ve necesaria "unha reorientación" máis profunda.
Neste sentido, volveu a analizar os resultados dos socialistas galegos, "en retroceso" nos dous últimos procesos electorais (municipais e xerais). Fronte á "alza de apoios" que, lembra, experimentou a formación cando el a dirixía, produciuse "un baleiro de liderado" e unha tendencia electoral negativa que atribúe a unha "estratexia conxunta" do actual líder do partido, Valentín González Formoso, e de José Ramón Gómez Besteiro, un dos nomes que máis soa, precisamente, como posible aspirante socialista á Xunta. Para Caballero, a tendencia é unha "alerta" evidente que debería facer "reflexionar" e "reorientar" o rumbo á dirección autonómica.
"A DISPOSICIÓN DO PARTIDO"
Neste sentido, aínda sen avanzar ningún paso concreto para as primarias, admitiu que prevé ampliar e reforzar o seu proceso de escoita á militancia en toda Galicia. Defendeu que non é "un político profesional", pero quere ser "útil" e está "a disposición" da súa formación co obxectivo de reforzala como "un partido de esquerdas, galeguista, feminista e ecoloxista". Tamén considera que hai que "fortalecer" o grupo parlamentario en oposición ao PP, e articular os mellores equipos afastándose de actitudes "sectarias".
Pola súa banda, afirma que falar con compañeiros reafírmalle o "apoio" de moitos deles; e atópase "con forza e ilusión". Por iso, continuará o diálogo, á vez que reta á cúpula do seu partido a "reflexionar" para perfilar a vía que poida ofrecer unha "mellor" alternativa aos populares de face ás autonómicas.
A VICEPORTAVOZ PARLAMENTARIA RESTA IMPORTANCIA A ESTAS DECLARACIÓNS
A viceportavoz parlamentaria do PSdeG, Begoña Rodríguez Rumbo, reduciu as opinións do ex secretario xeral do PSdeG ás de "un militante máis". "Todos temos opinións diversas", dixo Rodríguez Rumbo a preguntas da prensa este luns, polo que "el é un militante mais e, por tanto, pode facer unha opinión como calquero outro militante".
Cuestionada sobre se José Ramón Gómez Besteiro debe dar un paso adiante para presentarse ás primarias á Xunta, Rodríguez Rumbo, lembra que "calquera afiliado ten opción de poder presentarse" no momento no que se abran os prazos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.