O BNG critica a deriva "antidemocrática" do PP: "Como non lle gusta o que di o Consello de Contas, bloquean o debate"

A portavoz de Facenda do BNG, Noa Presas, criticou a deriva " antidemocrática" do PP e esixiu aos populares que "paren de amordazar" o Parlamento galego e "desbloqueen" a convocatoria da Comisión do Consello de Contas. Neste sentido, os nacionalistas rexistraron unha petición para que se convoque a Comisión de Relación co Consello de Contas, "que leva oito meses sen reunirse", co obxectivo de debater e ver todas as propostas dos informes emitidos polo órgano fiscalizador.

"Como non lle gusta o que di o Consello de Contas, como acabamos de ver no último informe demoledor sobre a situación da saúde mental en Galicia ou hai escasas semanas sobre a Conta Xeral e os chanchullos do Partido Popular, o que fai o PP é bloquear que se poida debater e facer propostas", criticou. Neste sentido, a deputada nacionalista recriminou que desde o inicio da lexislatura o PP "impuxo un atraso sen precedentes" na convocatoria do órgano fiscalizador para o debate dos informes e a aprobación da Conta Xeral. Ademais, Presas denunciou que debido a este "bloqueo" a que se reúna a comisión, hai máis de 25 informes sen debater, "con temas tan importantes como a Conta Xeral, as autovías con peaxes na sombra ou o Covid", entre outros temas.

"Hai que debater os informes do Consello de Contas que poñen luz sobre a privatización da sanidade, sobre como o Partido Popular emprega recursos públicos para favorecer os contratos a dedo, como fai unha mala xestión dos fondos europeos, como se certifica que Galicia perde co sistema de financiamento ou que houbo un sobrecusto no hospital Álvaro Cunqueiro", exemplificou. Con todo, Presas tamén destacou que "nin sequera se debateu o Informe de fiscalización das eleccións", que foi remitido en xullo de 2024 e que, segundo lembrou, "hai tradición de facelo a ritmo".

A portavoz de Facenda do BNG, Noa Presas | Fonte: BNG