A Xunta financia nove prazas en Proxecto Home para atender a persoas con trastorno psiquiátrico derivado do abuso de psicotrópicos

A Consellería de Política Social e Xuventude achega este ano 154.000 euros para desenvolver o programa 'Acougo' en Proxecto Home, co que a Fundación Monte do Gozo atende a persoas con trastornos psiquiátricos derivados do abuso de consumo de psicotrópicos. 

O director xeral de Inclusión Social, Arturo Parrado, abordou este martes co director xerente da Fundación Monte do Gozo, Ramón Gómez, a continuidade desta iniciativa que dá asistencia en réxime residencial ou semirresidencial, en función da autonomía e a situación familiar de cada usuario.

Así, a Xunta financia a totalidade do custo correspondente a nove prazas. A atención prestada inclúe a participación en grupos de autoaxuda, seminarios, talleres ocupacionais e a adquisición de habilidades sociais, entre outras asistencias.