Por Europa Press / Redacción | SANTIAGO DE COMPOSTELA | 08/08/2023 | Actualizada ás 18:56
O PP de Santiago denunciou este martes "as ansias recadatorias" do Goberno de Goretti Sanmartín tras propor "impor máis impostos aos propietarios de pisos" baleiros para loitar contra o problema da vivenda na cidade, algo para o que os populares apostan polo bono social.
Sanmartín dixo este luns que unha das "prioridades" do goberno local é a de "dinamizar" o "importante parque de vivenda baleira" que hai na capital galega. Neste punto, a alcaldesa está aberta a actuar sobre a fiscalidade para impulsar que os propietarios faciliten esa dinamización e mobilidade.
Para o concelleiro popular José Ramón de la Fuente, a alcaldesa é "sobradamente coñecedora" de que os inmobles baleiros "só supoñen un dos factores na carencia e subida de prezo das vivendas en Santiago". "Pero, cando non hai ideas, non queda outra que repetir como un mantra que é este o verdadeiro problema e así aproveitar para imporlles aos veciños outra labazada impositiva", engadiu.
Fronte a isto, o popular dixo ao goberno local que "se de verdade quere tomarse en serio o problema da vivenda" na capital de Galicia, "só ten que botar unha ollada ás propostas presentadas" polo portavoz do Partido Popular, Borja Verea, durante a campaña electoral, como un "programa solvente de aluguer cun bono social".
Así mesmo, os populares tamén apuntan que "hai levar a cabo a modificación da regulación urbanística, co fin de permitir vivendas en baixos comerciais, empezando primeiro polos barrios de Conxo e Santa Marta". "Todo parece indicar que, para o BNG e os seus socios, os problemas só teñen unha solución: a recadadora, ben vía imposto, vía taxa ou vía prezo público", dixo José Ramón de la Fuente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.