As visitas á illa de Tambo, un éxito tras ser aberta ao público despois de moitos anos usada para fins militares

O presidente da Xunta, Alfonso Rueda, destacou este sábado na illa de Tambo o valor patrimonial e natural deste espazo e de toda Galicia, e apostou pola súa dinamización como destino turístico e cultural "dunha maneira sustentable". "É unha das moitas marabillas que temos en Galicia e por tanto, temos a obrigación de conservala e de facela disfrutable. En primeiro lugar, para os veciños de Poio, e tamén para todo o mundo dunha maneira sustentable e que se poida pór en valor e respectar toda a historia da illa", afirmou.

O titular do Executivo galego, acompañado do conselleiro de Cultura, Educación, FP e Universidades, Román Rodríguez, desprazouse a este enclave da ría de Pontevedra, pertencente ao concello de Poio. Alí, valorou a importancia de que agora sexa posible visitar este espazo, que durante moitos anos permaneceu pechado ao turismo polo seu uso militar. Na súa intervención, Rueda ofreceu a axuda da Xunta para "tentar botar unha man" para que a illa sexa "un elemento máis" do que sentirse orgullosos, tanto para os que viven todo o ano nas proximidades desta localización como para atraer a turistas a Galicia.

Nesta liña, reivindicou o ano turístico "fantástico" que, asegurou, vive Galicia, e defendeu que "o camiño é seguir así, pero facéndoo sustentable". "Isto é un perfecto exemplo. Non perder a cabeza e ter un turismo con 'sentidiño'; poder seguir crecendo, pero conservando todo e entendendo que se nos visita cada vez máis xente é porque sabemos conservar e coidar das nosas cousas e evitar erros que se cadra se cometeron noutros lugares e que agora para nós convértense en oportunidades", concluíu.

Illa de Tambo, na ría de Pontevedra | Fonte: Arquivo