Renovado o convenio de colaboración coas asociacións veciñais para iniciativas de igualdade

A Consellería de Promoción do Emprego e Igualdade e a Confederación Galega de Asociacións Veciñais 'Rosalía de Castro' renovaron un ano máis o programa de concienciación en igualdade, prevención e loita contra a violencia de xénero.

Con este programa, a Xunta de Galicia amplía o seu apoio ás actividades realizadas polas entidades veciñais que poñen o foco na igualdade de xénero e promoven relacións igualitarias entre mulleres e homes da comunidade cunha achega de 15.000 euros dos fondos do Pacto de Estado Contra a Violencia de Xénero.

No marco deste convenio de colaboración, englóbanse unha serie de talleres e charlas-coloquio, nos que se tratará de dar visibilidade á realidade da violencia de xénero desde un enfoque multidisciplinar, combinando contornas urbanas e rurais ao longo das catro provincias.

Cogave é a única Confederación Galega de Asociacións Veciñais que existe en Galicia, polo que é unha entidade de "gran representatividade social", apunta a Xunta. Nos últimos anos, o Goberno galego colaborou con esta organización en beneficio dos veciños que forman parte das asociacións federadas, das vítimas de violencia de xénero e da súa contorna directa, así como do resto da sociedade a través das accións de concienciación.

A tenor deste acordo, a Xunta apuntou que a nova Lei de igualdade que está a tramitar no Parlamento de Galicia é "o resultado dun proceso participativo que situará á comunidade á vangarda da loita contra calquera discriminación contra a muller".

Acción Feminismos Em Escracho | Fonte: Feminismogaliza