Ence entrega axudas do seu plan social a 17 asociacións veciñais de Pontevedra e da súa contorna

Representantes dos 17 proxectos adxudicatarios da convocatoria do plan social de Ence en Pontevedra participaron na entrega das axudas veciñais. O acto, na fábrica, consistiu na firma do convenio para a adxudicación das axudas, que, segundo destaca a empresa, "permitirá a inmediata posta en marcha dos proxectos".

As iniciativas presentadas desenvolverán as súas actividades no ámbito territorial e centraranse en actividades de dixitalización, mellora e mantemento das instalacións das asociacións e achegas destinadas á celebración das festas patronais, "contribuíndo así á permanencia das tradicións e valores culturais".

Algunhas das asociacións cuxos proxectos resultaron beneficiarios son a Asociación Rural Mulleres Estribela de Lourizán, o Colexio Plurilingüe de San Narciso, a Asociación de Veciños Alborada, a Asociación Cultural Santa Rita de Salcedo, a Asociación Landra Verde, a Asociación de Veciños San Roque, e a Asociación de veciños San Cristóbal de Poio.

Ence reivindica o seu compromiso cos veciños a través das axudas concedidas ás distintas asociacións e asegura que consolida así "o seu interese polo benestar da comarca". "Demostra o compromiso de Ence coa súa contorna, xunto co coidado ambiental co que a empresa desenvolve día a día a súa actividade, que se fai evidente na calidade da auga e o aire da ría de Pontevedra", afirma.

Os 306 proxectos beneficiarios do plan social desenvolveranse ao longo dos próximos meses, segundo a compañía, "favorecendo o desenvolvemento de iniciativas cidadás de loita contra a exclusión social, educación e cultura; deporte; recuperación e coidado da contorna; emprendimiento e economía; emprego especializado e axudas veciñais".

Entrega de axudas de Ence | Fonte: ENCE