Iniciativa Empresarial do Noroeste critica que o peche da térmica das Pontes "chega sen garantías de futuro"

O presidente de Iniciativa Empresarial do Noroeste (IEN) por Europa, Manuel Pérez, lamentou "profundamente" a decisión de autorizar o peche da central térmica de Endesa nas Pontes cando "aínda non se puxo a primeira pedra de ningún dos proxectos chamados a converterse na súa alternativa industrial". Considera, en consecuencia, que "chega sen garantías de futuro".

"Non hai solución para os empregos e, neste momento tampouco se disiparon os factores que tensionan o mercado eléctrico, como a guerra de Ucraína, e que aconsellaron fai menos dun ano prolongar a vida útil do complexo", remarcou, nun comunicado. Na mesma liña na que se manifestou xa en anteriores ocasións, Pérez salientou a importancia que ten a central térmica pontesa en Galicia (co foco en que "representa máis do 13 % da potencia instalada na comunidade") e en España.

Para o presidente da organización patronal, "é un peche precoz, que chega cando aínda estamos nun escenario cargado de incerteza, no que os proxectos xeradores de emprego que se anuncian como alternativa están demasiado afastados". Manuel Pérez puxo como exemplos a planta de hidróxeno de EDP e Reganosa, á fábrica de pneumáticos de Sentury Tire ou a planta de Ence e remarcou que todas estas iniciativas teñen en común que están nunha fase moi inicial.

"E para pór en marcha algunha delas, e tamén outras como a comprometida reactivación de Alcoa, ten que estar garantida a subministración enerxética. Teremos que esperar a que estean construídos e en produción os novos parques eólicos?", preguntouse. IEN por Europa reprobou, por último, que "unha resolución tan importante do Ministerio de Transición Ecolóxica deuse a coñecer vía Boletín Oficial do Estado un sábado do mes de agosto".

"O ano pasado quixeron pechar e as circunstancias obrigaron a manter activos dous grupos de produción. Creo que un ano despois segue sen garantirse o futuro dos empregos nin a seguridade da subministración e non por anuncialo cando o país está de vacacións vanse a diluír os efectos desta decisión", resolveu.

Endesa reactiva a súa central térmica das Pontes, a 2 de novembro de 2022, nas Pontes | Fonte: Europa Press