Rueda anuncia unha OPE en 2024 con prazas novas mentres apunta os "bos datos" do sistema educativo galego
Esta OPE prevese que vai na "mesma liña" das convocatorias dos últimos anos segundo confirmaron fontes da Xunta, isto é, na pinza das 1.600 de 2021, as algo máis de 1.000 de 2022 e as en torno 1.400 de estabilización da OPE de 2023.
Por Europa Press / Redacción | SANTIAGO DE COMPOSTELA | 13/09/2023 | Actualizada ás 12:40
O presidente da Xunta, Alfonso Rueda, quixo "contestar cos bos datos" que dá o sistema educativo galego ás críticas do PSOE, que denunciou neste arranque de curso escolar as condicións laborais do profesorado galego e as elevadas facturas ás que teñen que facer fronte as familias para gastos de libros e material escolar.
E fronte a estas críticas sobre a situación do profesorado, o mandatario autonómico anunciou unha nova Oferta Pública de Emprego (OPE) en 2024, que incluirá novas prazas e estabilización do persoal docente, tras a OPE de 2023 de estabilización.
Aínda que non se ofreceron os detalles, esta OPE prevese que vai na "mesma liña" das convocatorias dos últimos anos segundo confirmaron fontes da Xunta, isto é, na pinza das 1.600 de 2021, as algo máis de 1.000 de 2022 e as en torno 1.400 de estabilización da OPE de 2023.
No primeiro cara a cara do curso político no Parlamento de Galicia, Rueda defendeu a xestión dos gobernos populares e, fronte ás acusacións de peche de unidades educativas, acusou ao bipartito de pechar 103 en catro anos: "Se seguisen gobernando non quedaba ningún centro".
Roda tamén se referiu ao sistema de préstamo de libros universal, que foi motivo de debate noutras iniciativas plenarias deste inicio escolar, para incidir en que "fracasou" e asegurar que "non era equitativo". En contraposición, defendeu que Galicia "inviste cen euros máis" en axudas para libros e material escolar por alumno, de media.
Desta maneira, o mandatario autonómico salientou que en 2024 haberá "unha nova oferta de emprego público para seguir estabilizando e seguir apoiando ás familias" e remarcou que a Xunta seguirá apostando por "un sistema público excelente", con máis linguas, tecnoloxías, con máis competencias STEM e con máis FP e "aposta pola igualdade" e coas taxas universitarias máis baratas do Estado.
Na súa intervención, o presidente da Xunta, que tamén aproveitou para mostrar o orgullo de que a Casa Real escollese un instituto público de Oroso para abrir o curso escolar, defendeu datos como o investimento de 9.000 euros de media por neno no rural e os 7.000 nas zonas urbanas, así como os resultados do informe PISA que sitúan a Galicia á cabeza en varias materias. "Hai cousas que mellorar", dixo o presidente autonómico, quen pediu, en todo caso, ao portavoz socialista, Luís Álvarez, "non deixarse arrastrar" por outra forma de facer oposición.
"AMOR LOW COST"
Fronte aos datos do mandatario galego, que defendeu máis de 300 profesores máis, o portavoz do Grupo Socialista ironizou co "amor low cost" ao ensino e asegurou que se suprimiron 1.493 prazas de profesores no últimos dez anos e acusa de "deixar ás familias sen axuda" no inicio do curso máis caro.
Álvarez, que sacou á luz facturas reais de familias galegas para facer fronte ao curso, quixo evidenciar "que esta é a realidade do sistema educativo" fronte á gratuidade universal "eficiente" do modelo do goberno de Touriño.
Os socialistas galegos tamén censuraron que "non se pague a primeira matrícula universitaria" aos alumnos galegos ou que non haxa un complemento de bolsas de axudas aos estudos superiores. Tamén lle afeou a "falta de diálogo" co sector educativo e pediulle que abra esta canle de comunicación, porque isto supón que cada centro faga o que queira cada curso, á vez que pide abordar e "negociar novas condicións laborais" para o profesorado que non recuperou as condicións "dos recortes" de Feijóo.
