Santiago inspeccionará os locais de lecer nocturno tras o incendio na Sala Malatesta, que ten a licenza "en regra"
O lume orixinouse na madrugada do sábado ao domingo nun foco de luz da Sala Malatesta, o que obrigou ao desaloxo dun centenar de persoas, aínda que non houbo feridos. O incendio afectou os cables e ao falso teito do inmoble.
Por Europa Press / Redacción | SANTIAGO DE COMPOSTELA | 09/10/2023 | Actualizada ás 13:22
A alcaldesa de Santiago, Goretti Sanmartín, informou de que a Sala Malatesta, que a pasada fin de semana sufriu un incendio que obrigou a desaloxar a un centenar de persoas, conta cos permisos e a licenza "en regra". A preguntas da prensa este luns, a rexedora explicou que o Concello de Santiago realizará unha inspección "en próximos días" á Sala Malatesta. Asegura que forma parte dun programa de inspección que xa tiña previsto levar a cabo en discotecas e pubs da cidade, pero que agora se vai a "axilizar o máximo posible".
Así, remítese á investigación que realiza a Policía Nacional sobre o suceso na Malatesta. Mentres, lembra que o Concello fai inspeccións de locais de lecer nocturno "cada certo tempo" para comprobar que se cumpren cos requirimentos técnicos. Incide en que este programa de inspeccións xa se ía a realizar, pero agora van adiantalo "e a axilizalo o máis posible". O lume orixinouse na madrugada do sábado ao domingo nun foco de luz da Sala Malatesta, o que obrigou ao desaloxo dun centenar de persoas, aínda que non houbo feridos. O incendio afectou os cables e ao falso teito do inmoble.
