O BNG pide explicacións ao Goberno pola avaría do tren Alvia en Taboadela e pide un plan de mantemento "eficaz"
Os viaxeiros denunciaron en redes sociais que permaneceron retidos no tren máis dunha hora, sen información por parte de Adif. Acabaron sendo evacuados e tiveron que esperar na plataforma coas súas equipaxes ata ser trasladados a Ourense.
Por Europa Press / Redacción | OURENSE | 09/10/2023 | Actualizada ás 14:22
O portavoz do BNG no Congreso, Néstor Rego, dirixiuse ao Ministerio de Transportes (Mitma), do que dependen Renfe e Adif, para pedirlle explicacións pola avaría ocorrida no Tren Alvia 10211 que obrigou a parar o tren en Taboadela. Tal e como sinalan os nacionalistas nun comunicado, o tren facía a conexión Santiago-Madrid e sufriu unha incidencia por fume no último coche do tren, e foi evacuado ao redor das 21.00 horas.
Os viaxeiros denunciaron en redes sociais que permaneceron retidos no tren máis dunha hora, sen información por parte de Adif. Acabaron sendo evacuados e tiveron que esperar na plataforma coas súas equipaxes ata ser trasladados a Ourense. Adif continuou informando a través da súa conta de Twitter ata dar por resolta a incidencia.
Ante esta situación, o deputado nacionalista esixiu ao Ministerio que informe sobre a incidencia, pondo o foco en se a avaría estaba relacionada coa falta de mantemento. Preguntou ademais cando foi a última vez que se revisou ese tren. Así mesmo, interpela á compañía ferroviaria sobre as queixas dos usuarios pola falta de información e reclama a devolución do importe íntegro dos billetes polo ocorrido.
Néstor Rego alertou do incremento de avarías e incidencias nos trens de Galicia desde o inicio de setembro, especialmente no Eixo e nos trens de media distancia. Por último, empraza ao Executivo a contemplar un Plan de Mantemento e Revisións adecuado, xunto cun programa de renovación do material rodante que evite á reiteración destas situacións.
