Tres persoas estafan máis de 26.200 euros polo método do 'fillo en apertos', con vítimas en Brión e Betanzos

A Garda Civil, no marco da operación 'Helpboy', detivo a tres persoas en Sevilla e investigou a unha máis polos supostos delitos de estafas telefónicas en varias localidades (incluídos os municipios coruñeses de Brión e Betanzos) coñecidas co nome do 'fillo en apertos' que ocasionaran perdas económicas ás súas vítimas. A cantidade do diñeiro estafado ascende aos 26.299 euros.

A Benemérita detallou nun comunicado que as estafas seguían o mesmo modus operandi: as vítimas recibían unha mensaxe, por vía sms ou por algunha rede social, facéndose pasar polos seus fillos ou fillas. Nesta mensaxe, os detidos facíanlles crer que os seus fillos perderan o seu móbil e por iso comunicábanse con outro número, necesitando de forma urxente liquidez.

A continuación, os estafadores propuñan ás súas vítimas que realizasen unha transferencia bancaria a unha conta concreta, argumentando a imposibilidade de facelas eles mesmos por problemas no sistema. Cando as vítimas realizaban as trasferencias, os detidos extraían rapidamente o diñeiro a través caixeiros situados en entidades bancarias, supermercados ou salóns de xogos da provincia de Sevilla co obxectivo de que no caso de que algunha vítima reclamase o diñeiro, non houbese liquidez na conta.

Os investigadores analizaron varias contas bancarias relacionadas con estas estafas e localizaron movementos de ata 15.000 euros, descubrindo que os titulares das contas levaban un 5 % do diñeiro estafado por ceder a súa conta aos membros do grupo criminal. A actividade dos estafadores estendíase por varias provincias, entre as cales se comprobou que hai vítimas nas localidades de Brión e Betanzos. A cantidade do diñeiro estafado ascende aos 26.299 euros. A investigación foi levada a cabo por axentes da Garda Civil da área de Investigación do Posto Principal dos Palacios, na provincia de Sevilla.

Imaxe dunha persoa falando por WhatsApp | Fonte: Arquivo