As políticas galegas no rural recollen a presenza da muller no agro, que xa é líder en máis da metade de explotacións
Por Europa Press / Redacción | SANTIAGO DE COMPOSTELA | 14/10/2023 | Actualizada ás 18:32
O conselleiro do Medio Rural, José González, sinalou que todas as políticas da Xunta a favor do rural galego son representativas da presenza da muller neste ámbito.
Así o fixo durante a súa intervención de apertura de Alma Rural onde lembrou que o colectivo feminino está presente nas axudas do Plan de Desenvolvemento Rural de Galicia cunha prioridade nos criterios de valoración para a concesión das axudas.
Segundo informou o Executivo galego, estas axudas están destinadas a apoiar investimentos nas explotacións agrícolas, para a creación de empresas por agricultores novos e para o desenvolvemento de pequenas explotacións.
González subliñou a presenza maioritaria da muller galega á fronte das explotacións agrogandeiras, xa que o número das titulares en Galicia supera o 50 %, por encima do 22,6 % da media nacional.
Así mesmo, o conselleiro sinalou que a historia de Galicia "non se entende" sen a historia particular das mulleres e remarcou a súa contribución ao avance social como "loitadoras, emprendedoras, formadas, dinámicas e innovadoras".
O conselleiro explicou que Alma Rural parte da colaboración entre as consellerías de Promoción do Emprego e Igualdade e do Medio Rural, no marco do Pacto de Estado contra a Violencia de Xénero.
Na clausura do acto, a conselleira de Promoción do Emprego e Igualdade, Elena Rivo, lembrou que a contribución das mulleres rurais ao desenvolvemento económico e á igualdade de Galicia "é inmensa e merece ser celebrada".
En palabras de Rivo, este colectivo constitúe "a columna vertebral" da economía local, como preservadoras da terra e como motoras da actividade.
