Rebelión no mercado de gando de Silleda: compradores e transportistan rexeitan a poxa dixital

Unións Agrarias instou ás partes implicadas no conflito pola primeira poxa dixital de Silleda a actuar con "cordura e responsabilidade" para pór fin a un desencontro "que non beneficia a ninguén".

En concreto, o conflito orixinouse nun enfrontamento entre os compradores, que se negaron a utilizar a nova aplicación móbil para poxar polos animais, e os transportistas. Neste sentido, a organización fixo un chamamento para que as partes implicadas "cheguen a un punto de entendemento".

Así, Unións Agrarias apelou ao sentido da responsabilidade e esixiu que non se atrase máis o diálogo entre a dirección da Central Agropecuaria de Galicia Abanca e os compradores que rexeitan a poxa dixital. "Non podemos permitir que se siga facendo dano aos intereses dos produtores debido á incapacidade dos implicados de chegar a acordos", destacou a organización agrogandeira nunha nota de prensa, na que tamén lembrou que a paralización da poxa desemboca nunha "complicada tesitura" que, en última instancia, "provoca máis gastos e un aumento dos custos de produción para as explotacións".

Con todo, sinalou que se a situación non se reconduce nas próximas horas, esta semana pasará sen que se poida celebrar a cita semanal dos martes. "Un escenario totalmente indesexable ante o que Unións Agrarias mantense expectante e insta aos implicados a limar asperezas", concluíu a organización.

Vacas no mercado de gando de Silleda | Fonte: Campo Galego