A Airef di que as previsións macroeconómicas da Xunta "son lixeiramente superiores" as súas estimacións

A autoridade independente de responsabilidade fiscal (Airef) avala as previsións que acompañan ao proxecto de orzamentos de 2024 da Xunta de Galicia. Nun comunicado, a Airef constata que estes datos presentan estimacións de crecemento do produto interior bruto (PIB) e dos seus compoñentes polo lado da oferta e a demanda en termos de volume, así como do PIB en termos correntes, do deflactor implícito do PIB e do emprego para o período 2023-2024 distintas das últimas estimacións do escenario macroeconómico para o conxunto estatal.

Seguindo o establecido na lei de creación da Airef, as previsións macroeconómicas que se incorporen nos proxectos de orzamentos de todas as administracións públicas deben contar cun informe da institución indicando se foron avaladas.

Aínda que a análise e a consistencia macroeconómica e fiscal dos orzamentos das comunidades resultan "de notable importancia", a Airef sinala que os recursos das comunidades autónomas veñen "fundamentalmente determinados polos recursos do sistema de financiamento, suxeitos a entregas a conta e a súa posterior liquidación".

GALICIA

Galicia estima un crecemento do PIB en termos de volume do 1,9% en 2024. "Esta previsión é inferior ao abano de previsións efectuadas por outros organismos para a comunidade autónoma", apunta a autoridade independente de responsabilidade fiscal, aínda que agrega que "a maioría dos analistas aínda non recollen as revisións recentes da contabilidade nacional".

Engade que se sitúa entre os percentiles 40-60 das estimacións da Airef (estimación central do 1,6%). O crecemento nominal esperado para o ano 2024, para o que se formulan os orzamentos, resulta "lixeiramente superior do previsto pola Airef, aínda que resulta factible dada a elevada volatilidade dos deflactores nos últimos anos".

Estas previsións realízanse nun contexto de "alta incerteza pola materialización de numerosos riscos identificados pola Airef desde finais de 2021", constata, centrados ao redor da crise enerxética, a persistencia da inflación e o endurecemento das condicións de financiamento.