O Goberno galego aporta 250.000 euros para a construción do centro loxístico das Pontes
Por Europa Press / Redacción | FERROL | 18/10/2023 | Actualizada ás 18:54
O Consello da Xunta acordou a firma dun convenio de colaboración entre a Consellería de Economía, Industria e Innovación e o Concello das Pontes de García Rodríguez para a construción e posta en marcha do centro loxístico deste municipio. O Goberno galego achegará 250.000 euros, o 25 % do total.
Esta infraestrutura localizarase nunha parcela de 9.000 metros cadrados no parque empresarial Penapurreira e constará de dúas naves anexas (unha para uso loxístico e outra para almacenamento a granel) e unha zona de oficinas cunha superficie construída de 2.000 metros cadrados. Tamén haberá unha báscula de pesada de camións e unha ampla zona de carga e descarga.
O Goberno galego subliña que este centro loxístico aspira a "dinamizar a economía local e paliar o impacto do peche da central térmica". Busca aproveitar que na zona existe unha gran cantidade de empresas e camioneiros que viron reducida a súa actividade. A previsión é poder asinar este convenio ao longo deste mes e a data límite de xustificación será o 30 de novembro.
